Transformer 2 : 迷失科技中

一部電影大製作係乜？以前講靚人靚景，而家加多樣高質素CG畫面。只係咁多。

巧合既係，拍一部寫真集既要求亦係一樣。

推論：有一日周秀娜出本本地三大CG公司做後期製作既寫真，絕對有望衝入荷里活市場。

===============================

回歸正題，睇變型金剛第二集，期望應該放係邊度呢？佢絕對稱得上係大製作，極浩大既場面，驚天動地既劇情背景，極高技術既CG畫面…至少係畫面上，能夠給予觀眾極度滿足。

只不過，步出戲院之後，除左套戲好靚，又會有咩印象？

呢套戲有幾個重點可以講。首先就係戲既最大賣點：動畫技術。動畫技術之高固然無容置疑，只不過當見到一個俏美眉係主角面前幻化成一個未來戰士，當見到盜寶既變型「飛蛇」變身既時間比最後決鬥既時間仲要長，又或者當睇足九十分鐘既華麗爆破場面發現導演依舊樂此不疲，我開始會問：會唔會賣弄得過火了？技術背後並沒有劇情支橕，根本同推一隻短片collection去show off技術冇分別。至於男女主角無謂既拋胸場面，係CG畫面中突圍而出，只能話好忠實地保留荷里活大片既傳統。

第二樣要講既係劇情。對於英雄救地球既片，係唔應該對劇情抱太高期望（好似蝙蝠俠咁深刻既劇情，係好特殊既例子） ，但係始終有基本要求。係變型金剛二入面，各種伏線都冇好好處理，主角解謎既主線過份兒嬉，主線裡面男主角既心理冇好好發揮固然可惜，各種支線支離破碎更加令人摸不著頭腦；諸如狂派捉男主角既父母去引主角，果個陷阱未免太易就解決左喇掛？拜倫同佢既兄弟既恩怨可有可無…種種問題，主要係劇情拍得冇力，令到浩大既劇情只得空殼；而剪接手法亦問題多多，令場面十分混亂，更加追唔到劇情。

再者，就算我可以對「大美軍救人類」呢種自我中心既思想放下成見，亦都難免要懷疑，戲入面過份誇大美軍既重要性了？既然可以一炮打倒建造派，一開始用十支炮將狂派同果個高科技搖控器打爆，豈不是一了百了！何苦要咁多變型金剛出黎用功夫去打倒狂派？

第三係期望既問題。姑且放下一切批判既眼光，以一個變型金剛支持者既身份去睇呢套戲。問題少年又來了：拜倫同佢既兄弟係古神媽？點解男主角迴光反照會係天堂見到佢地？狂派幾時變成Terminator（仲有條脷）？爵士同果幾架電單車點解只係花瓶角色？諸多問題，我估問到天光都未問完。

以上報告係基於「一般電影院」睇到既版本。聽說IMAX會有比較完整既版本，或者期待Director's Cut DVD，會有比較完整既劇情掛？

====================

Trasnformer2 DVD同周秀娜寫真，你會揀邊樣？

參考文章：睇下大超點睇呢套戲。