離開娘家，一個人搬出來住，洗費認真不少。
慳？衣食住行什麼也是錢。賣少件衫？賣少件玩具？仲可以點？
自己煮飯食! 自出娘胎，我極少入廚房。最多都係煮個公仔麵，洗下米。怪不得娘親好擔心我搬左出來會無啖好食。
"馬屎落地行"，為左慳錢，最後我都係要自己煮架。有我女友既指導，同埋同d friend傾下點煮，就係咁開始我煮飯男既生涯。
今日賤兔教左我佢家傳既 "豉油糖雞翼", 我立即去百佳買料返屋企做實驗。可以同大家分享下!
1) 冷藏雞原來要放入水。一來解凍，二來出左雪味。
2) 燒熱個鑊，加一片薑，少少salt同油
3) 中細火去煎雞翼，大約煎十分鐘，比d耐性唔好急。用筷子刺開雞翼，睇下內部情況。
( 本人小時食過雞翼刺身，自始對雞翼方全熟與否，多了一分執著 )
4) 當 9 成熟時，加入豉油，糖。快炒兩下，同D雞翼上色就好上碟lu~
煮飯係幾好玩，不過要好多時間，所以要快~ 快~ 快~
因為雞翼要d時間解凍先可以煮，今日煮耐左少少，要43分鐘。呢個就我既一人晚餐啦!
哎... 食完飯仲未洗碗!
1月4日起，即下午5時至9時，全線麥當勞的巨無霸餐、脆辣雞腿包餐和豬柳蛋漢堡餐，將一律以＄20價發售。
原來十年前已經賣＄20，咁究竟第一次發明套餐時是賣多少個大洋呢？
友人上山頂，左揀右揀都入左去Spaghetti 360食，只因望落價錢不太貴，而且都有露天既位可以望下風景。入到去睇見裝備似曾相識，原來呢間就正正係Spaghetti House集團旗下。
餐牌型式同Spaghetti House如出一徹，款式比較多，有日式韓式等「潮食」，好唔好食我就無從評論喇，只係去意粉屋唔能夠期望佢俾到好好食既日式石頭鍋飯你掛。係侍應大力推銷之下，我地都選擇左好大路既二人套餐；二百幾蚊既套餐有酥皮湯、意粉、小食同埋一件Pizza，份量都可以。至於食物質素嗎？同意粉屋都相去無幾，討厭意粉屋既人就無謂去了。
酥皮湯，懷疑全世界既酥皮湯都係倒模出黎，味道係邊度飲都係一樣的。
小食係炸茄子，出乎意料之外既好，薄薄一層天婦羅炸漿，中間茄子炸得剛剛好，同沙津醬好配合。
Pizza係好薄果種（俾港人食會鬧「點解Pizza咁薄，都係Pizza Hut好o的」果種），口味依然係港式，三文魚子係好有咬口，不過配埋蒸到乾既蛋同火腿，食到人都乾。
意粉係黑松露雜菌意粉，感覺上係剛剛拎出冰箱既菌拎出黎煮咁，唯一優點係唔會太杰。
考慮到價錢，整體感覺不太壞，只係相信山頂有更好既選擇。附帶一提，呢間舖望山，入夜後望到既風景有限，不過黃昏睇到既落霞境好靚，早食飯的話記得拎露天位。
蘭杜街係近來好受歡迎既食街。唔記得街名唔緊要，呢條街就係一間蝦麵店所在既街道；而呢間越旺就正正係蝦麵店鄰居既一間越南食肆。
午飯時間去到蘭杜街，原本一心想去食蝦麵店；見到呢間舖同蝦麵店一樣人頭湧湧，一瞬間令我雀雀欲試，所以就改變主意喇。雖則多人食既野唔一定好，只不過試一下無妨，大不了咪當係瞭解下白領們食晏既口味？
舖頭不大，走動空間有限；不過我敢話黎蘭杜街食晏既人唔會要有幾好坐掛？主打既係越南湯河，我自己冇試過，睇到隔離食緊既一碗，放左好多香葉係上面，上菜果陣已經香氣四溢，下次一定要試真佢。至於我叫既，係上圖影果碗，蕃茄湯底既生牛肉河粉。蕃茄湯底不錯，味道夠濃，只係稱不上好獨特－要係其他地方試到咁既蕃茄湯底唔係難事。河粉係大路既貨色，牛肉勝在夠多，而且係貨真價實既「生牛肉」，唔會有上菜已經熟哂既問題。相比起普通湯底既生牛河，呢碗既配料只有芽菜同生洋蒽，缺少左香草既輔佐，感覺遜色不少。當然，蕃茄湯似乎冇必要再配咁多香葉－只係要係香葉同蕃茄湯底二選一，我會認為選香葉該比較好。
呢碗麵食左三十六蚊，算得上物有所值，只恨冇試到清湯底既生牛肉河粉，只有以後再試喇。
見高人寫飲飲食食寫得咁開心，等我又寫下先。為左慳錢，通常都係帶飯返公司食。比人笑做"帶飯仔"既我，一星期總有一兩日跟同事去食下飯既。前幾日就跟同事"打的"去左筲箕灣東大街食野啦~
去到門口巳經人頭湧湧，唔少白領同街坊都係門口等梗。好左唔駛等好耐就有位啦。同事話呢度出名既係切腩，當然要試一試啦。講到識食一定唔到我。係我媽媽既特訓下，我可以將食物歸類為"唔熟"，"熟"同埋"好食"。我諗今次既切腩，清得來又夠林，係好食既一類。
最後試左個好似叫做"多士奶多"既物體，係估唔到咁好食。外層個包夠熱，鬆化得來又夠脆，咬入去仲有凍牛油。真係好滿足。
食左一個滿足既lunch，charge足電下午又要返去做野啦~
唔食燒味既時候就會搵下其他選擇。呢間北京水餃皇係謝斐道近盧押道，大大個招牌。水餃都合我心水，去馬。
一碗韮菜豬肉水餃十隻三十蚊。放湯不放湯任君選擇－不過要視乎邊位侍應招呼你，呢個係後話。咬開餃子，韮菜香味十分清勁，豬肉份量亦恰當。試過其他的，只有羊肉水餃比較特別，其餘都比唔上韮菜豬肉餃。
睇到酸辣湯賣相都不壞，好多人會叫。不過大熱天怕食辣，有機會再試下啦。
呢間似乎係北方人開既舖頭，有幾位侍應講話會有口音。其中有一位阿叔，老實得可愛。以下對話，發問既係同台一位OL小姐。
「我想食水餃，有乜推介？」「韮菜豬肉水餃。」
「其他呢？」「其他都唔好食。」
「咁…要韮菜豬肉水餃。」「放唔放湯？」
「有乜分別？」「你地食慣放湯。我地唔放。」
「唔…」「快O的！」
「好啦，要放湯既…」
同台有兩位北方同胞，叫左二百幾隻餃子，仲有酸辣湯、小菜、豆漿等等。阿叔二話不說，俾兩兜冇放湯既餃子佢地。一種餃子，兩地食法。希望唔好有一日係Openrice見到有人寫話，「呢間舖連放餃子既湯都慳…」
話說短短半年既「署男」生涯，因為同同事食飯喜好太不同，養成左自己食晏既習慣。一個人食飯缺點係唔食得多野，不過食晏本來就唔會食太多，不構成問題；反而係一個人，去邊度搵位都易，而且可以依心情隨便選擇，係享受自由既快樂時間。
我本身喜歡食燒味。係灣仔要食燒味，當然就閃出「再興」既招牌。我唔敢扮識食，而且呢個招牌應該都好知名，只能講，今日小民跟隨大眾口味，來朝拜一番喇！
叉鵝瀨一碗，盛惠廿二蚊。湯底好甜，唔知是粟米還是魚的香味，食唔出。什麼叉燒肉很爽，燒鵝肉香甜，不贅述。反正就係值得一試。順帶一提，底下仲有一層叉燒同幾舊鵝，好抵食呀。
順帶一提，服務非常好。當然唔係五星級果種有人斟茶遞水既服務－係欣勤貼心既服務，冇一般燒臘店果種「西口西面」既侍應同斬料師傅。
題為「燒臘檔」，仲有其他可以講。除左再興，小署附近其實仲有幾間。有間叫雙喜既，係謝斐道，午飯時間亦都係大排長龍。我比較單調，依然係食叉鵝瀨。
水準過得去，我自己嫌燒鵝切得太大舊了。盛惠廿二蚊，亦都係抵食既。
呢間雙喜處於人流極多既地方，午飯時間去的話人山人海，絕對坐得唔安樂，阿姐亦都好唔客氣地趕你走－我個人對於呢一點無意見，去燒臘店從來唔幻想太多－不過同場有好多大叔係度抱怨阿姐態度差勁。
其餘選擇似乎唔多，灣仔白領不愛燒味嗎？
© Free Blogger Templates Nightingale by Ourblogtemplates.com 2008
Back to TOP