食晏在筲箕灣：安利魚蛋粉麵

見高人寫飲飲食食寫得咁開心，等我又寫下先。為左慳錢，通常都係帶飯返公司食。比人笑做"帶飯仔"既我，一星期總有一兩日跟同事去食下飯既。前幾日就跟同事"打的"去左筲箕灣東大街食野啦~



去到門口巳經人頭湧湧，唔少白領同街坊都係門口等梗。好左唔駛等好耐就有位啦。同事話呢度出名既係切腩，當然要試一試啦。講到識食一定唔到我。係我媽媽既特訓下，我可以將食物歸類為"唔熟"，"熟"同埋"好食"。我諗今次既切腩，清得來又夠林，係好食既一類。

最後試左個好似叫做"多士奶多"既物體，係估唔到咁好食。外層個包夠熱，鬆化得來又夠脆，咬入去仲有凍牛油。真係好滿足。


食左一個滿足既lunch，charge足電下午又要返去做野啦~