洲際國家盃 ~ 決賽精華
2009年6月29日 星期一
09年的洲際國家盃決賽係美洲區內鬨，係巴西對美國。賽前一面倒睇好巴西。
結果係就係巴西嬴，不過都幾險。點險法？自己睇~
毒到震既〈變形金剛〉
2009年6月28日 星期日
( 轉自 www.idwpublishing.com )
Transfomers既電影好收得，帶動左周邊產品。老實講。套戲就無咩劇情架啦，不過由ILM(Industrial Light + Magic)做既特技依舊好有睇頭。
細路仔有的玩具，都不外乎車仔同機械人。我就最仲意變形金剛啦！變形金剛最煞食的地方，當然係變形啦！我中毒的事係由我細路仔時開始的，仲記得以前成日拎住亞媽買比我既救護車(好似叫力捷)四周圍碌。
由於我孤寒同埋無位放(巳經有10隻係公司)既關係，巳經好耐無買Transformers的玩具。呢期睇中左係XBOX推出的《Transformers: Revenge of the Fallen》。行行下又可以變車變飛機，諗起就正啦。聽講仲可以好似 Gear of War 咁上網同人 4 打 4。如果GamePlay同Game Balance做得好的話，真係要買！有無人試過？有的要report下啦~
官方Trailer
更詳細的GamePlay介紹：
最尾仲要比我見到我最愛的"建造派"(Devastator)，真係毒到呢~~~~~~~~~~~
( 轉自 www.aridiwrites.com )
23 + 33 = Champion ?
大鯊魚奧尼爾正式簽約加盟大帝占士的騎士，並改穿大學時代的33號球衣，23+33的佐敦和柏賓組合十幾年後再現江湖，當然平均身高和體重明顯上昇，以老頑童奧尼爾上季反老還童的表現，加上十幾年經驗，好好配合以占士為球隊重心的打法，對上塞爾特人三叉戟都會很有看頭。
至於換來卡達的魔術，小弟則不太看好，重點還是看魔獸有多大的進步。
朗尼加盟美國欖球聯賽？
2009年6月27日 星期六
非也~
實情係曼聯來季的新波衫，心口大黑Ｖ的設計好有呢欖球衫的味道。
作為紅軍既ｆａｎｓ，見到死對頭著住件咁核突既波衫，心到涼曬。
XXX has beaten your score in Typing Maniac! PLAY NOW to beat him!
連日來的飛屎卜就是不停的收到這類訊息，上班還打不夠，回家還在苦練？但不服輸，還是打了幾回，至少不可輸過大超嘛。
[圖:飛機仔蒙迪拿的招牌慶祝方法 ]Eason Chan ● H3M
2009年6月23日 星期二
我自己就好欣賞Eason對音樂的熱誠，佢為香港人帶左好多好音樂。之前聽佢的新碟＜H3M＞，感覺係出奇的普通，成隻碟無一Ｄ似＜富士山下＞咁出的歌。聽多幾次，慢慢細味之後，先發覺隻碟實在好有味道。仲記得有個朋友同我講：首歌第一次聽就夠得好聽既，叫流行曲。好聽的，要聽多幾次先feel到。
＜沙龍＞係其中一首我覺得好正的歌。o岩o岩係youtube見到一個鬼佬自彈自唱，同大家分享下先。
佢真係好投入，但聽聽下有d位會毛管動。都唔知係唱得太好聽定還是太感動。同場加映以Pixar電影WALL-E故事做創作靈感的＜七百年後＞。
勇者鬥惡龍: 正生vs梅窩居民
古代勇者鬥惡龍，係單純既英雄故事，例如大衛王戰巨人歌利亞。邪不能勝正，結局皆大歡喜。
今日香港出現勇者鬥惡龍故事既翻版：一群要改過自身既正生學生，面對張牙舞爪既梅窩居民，奮力地爭取新校舍…以上係最近於大小傳媒見到既故事。同大衛王既故事分別，在於除左勇者同惡龍既角色，還有一大堆搖旗吶喊既蝦兵蟹將：有前官員哭正生學生，有現任官員要表態支持。故事天天精彩，有彩色報導，有映畫視像，絕對比大衛王果幾行字既故事精彩百倍…
…除左，今日既故事，變成了政治鬧劇，角色錯亂，結局是黑色悲劇。
我支持正生書院既方針。同一個部落格既野，我唔打算重覆，請睇大超既文。問題係，當正生要遷入梅窩，是否因為梅窩市民反對就將佢地打造成十惡不赥既惡龍？
反對聲音固然有偏激的。什麼正生書院遷入會提高犯罪率，咩吸毒青年，再難聽既言詞，加諸係正生學生身上；難道佢地入正生，就唔係為左改過自身？不過另一方面，梅窩市民既正面訴求，又有受過幾多注視？大家睇Youtube既片，有冇睇理智既梅窩居民意現？睇報紙大標題橕正生，有冇留意後面果版都有梅窩居民合講既話？要求發展梅窩，要求子女唔使遠渡上學，難道就係不合理既訴求？
正生需要一家校舍。梅窩居民想子女係原區返學。要得到雙贏既方案，想來唔超出政府既能力範圍之外。而家有既係乜？成件事變左質，傳媒大力煽動，不知羞恥既政治家大力表演撈油水，將自身原本既責任推得一乾二淨。蝦兵蟹將本身唔係閒角，而係始作俑者，而家企埋一邊當自己係啦啦隊，享受弱小社群被欺壓既成果，至最後皮笑肉不笑出來善後，將勇者鬥惡龍既現代版故事推向另一境界。
正生要唔要遷入梅窩，社會似乎早有定案。居民既訴求，不知何日能得到回應？
老殘意大利遊南非
09年洲際國家盃，意大利隊殘的殘，老的老。繼爆冷輸比埃及1:0，再比巴西數三蛋，認真羞家！
06年的打到識飛，拎埋世界足球先生既簡拿華路，以穩健的防線帶領意大利走上世界之顛。三年後的今日，35歲的隊長巳經唔識飛lu，係時間退下來啦。
正生書院
2009年6月21日 星期日
迷失，我諗大家都有試過。人生要點過？點解要返學？唔知自己做緊咩？
失去方向的船，好容易就會係大海迷失。
香港呢一代，肯生細路的巳經唔多。生左出來，肯教又識得教o既就更加少。而家d細路唔識自愛，好易學壞。吸毒，打劫，援交咩都有，真係唔知咩世界 =_=天地有正氣，香港仲有間正生書院，肯去幫一d放棄左自己o既細路。係正生出返來的人，未必可以做到醫生律師咁有成就。但至少，佢地可以走出絕望，係以後的人生認清方向，好好咁生活落去。
可以的話，正生書院唔止要搬去梅窩，仲要開多幾間分校。拯救一下我地香港的下一代。
正生書院網站
http://www.drugrehab.com.hk/zs_college.htm
NBA Finals 2010 Game1 NBA Live 10 vs NBA 2k10
2009年6月13日 星期六
09年的NBA Finals，係湖人vs魔術。暫時大分3比1，魔術大勢巳去，始終湖人經驗老到，睇來今年都係佢地架啦。球場外，都係湖人vs魔術。近年暮起的2k Sports，巳經挑戰緊NBA Live(Electronic Arts)多年獨大個局面。
NBA 2K10 落足本，請左高比仔來做封面。不過，可能高比仔太寸，唔係太多人受落。
那邊廂，NBA Live10都搵左「超人」候活做封面。雖然名氣唔及高比大，不過候活人品好。今年的入樽賽時，捨身比對手借來做障礙物咁跳過，氣度令人敬佩！
講Game Play，2k-Sports的動作細緻，遊戲平衝都做得好好，玩起上來都幾易上手。NBA Live做左咁多年，做來做去都係唔好玩，真係諗唔明。NBA Live贏的係network做得好，上網打機唔會窒下窒下咁。不過，如果2k-Sports克服到呢個問題，咁NBA Live就byebye啦。
紅●魔●C.朗拿度
睇下C.朗拿度鍚個聯賽杯鍚得幾深情！
繼卡卡之後，C.朗拿度 以8000萬英鎊的破世界紀錄轉會費，成為皇家馬得里「銀河艦隊」的一員。「反骨」、「囂張」巳經係C.朗拿度的代名詞，我諗唔少球迷對佢的離隊不知幾開心。
8000萬英鎊即大約 10 億港元， 10 億港元可以做到d咩？
1) 射多支神舟六號火箭
2) 養起成支伊拉克軍隊一年
3) 阿聯酋迪拜的七星酒店住198年
4) 買500萬枝豬流感疫苗
5) 夠一百萬個非洲兒童食唔知幾多年
用左咁多錢，咁其實皇馬可以點樣慳返d錢呢？我提議唔駛請領隊，全因為佢地的主席佩雷斯而經做埋領隊果份。另外可以放走魯爾同雲佬套現，佢地係唔夾的。皇馬下年可唔可以擊敗巴塞重奪西甲冠軍呢？唔可以！
( 以上巳經Winning 測試 )
導遊拾趣
2009年6月10日 星期三
上星期偷得幾日浮生，去海南島渡假數天。渡假既內容乏善足陳，不外乎陽光海灘；反而由海口去酒店兩個鐘頭既車程中，導遊講既故事堪稱旅程最精彩既地方。
導遊係海南島本地人，做過一陣子海員，然後就投身旅遊業；帶過全中國大小城市來海南島既團，可謂經驗豐富。話題由開頭沉悶既自我介紹同家有惡妻－－我懷疑係咪大陸人都鍾意拎自己既伴侶黎講，於我自己睇話自己家有河東獅咪即係好自豪自己係個小男人？－－轉到帶團經歷上面。
「我帶過既團，都係香港既團帶得最輕鬆。大家一上車，好合作咁就留低左最前面個位俾我地工作人員坐係咪？我帶過一團廣州來既團，一上車，前面既位坐爆哂；我同佢地講『最前排係工作人員架喎？』你估佢地答乜野？『我要坐呢個位，呢個位最好風景，前面同側邊都望到！』」
「講到野蠻，我帶過一團重慶團，黎到買哂菠蘿、香蕉等等上車就係度食。當時果架車每個位都放膠袋係度，俾人做嘔吐袋，我就同團友講，你地食完既皮同核，放入個膠袋度，方便清理啦！點知又係冇人理，全部人食完生果就掉係地下。你知夏天既季節，發臭架嘛，結果成車就有陣怪味。我諗住第二日又要坐成日，當做下義工，夜晚幫手清理下啦；點知臨落車之前，有個團友走黎同我講『你今晚同我清哂啲垃圾佢！』然後頭都唔回就落左車！哈！我原本都諗住幫你清既，你咁講我反而唔想幫你喇。結果點？第二日咪個個同啲臭生果渣坐車。」
睇導遊個樣又唔似咁好骨氣，呢度已經加分俾佢。
「大陸唔同地方既人會帶好多唔同既習慣黎，只不過一個地方既習慣去到另一個地方可以鬧出好多笑話。試過有一團西藏人，第一日黎到，全部都係著白恤衫黑西褲，仲有西裝褸，好似冬天出去街咁；我就同佢地講，請各位聽日換哂冬天既裝束，著短袖衫，海南島天氣好熱架…點知第二日，佢地依然係著住果套黑色西裝，仲多左每人一條毛巾。遊左半日我就已經見佢地條毛巾好似滴水咁，點解唔換件短袖衫？可能住係北方，冇咁既衣裝掛！」
「香港黎既人當然都有。試過有三個後生仔，兩男一女，黎到叫我帶佢去體驗下農村生活，於是我就帶左佢地去興隆既農場。去到果度，個後生女問，『有冇洗手間架？』你同農民講咁既詞語，人地點知你講乜？最後我帶佢去廁所，佢一望見就話：『呢度…唔係豬欄黎咩？』我答佢：『係呀！農村丫嘛！人同豬一齊去廁所，你地去完既糞便仲會留起，搵禾筸草放係上面，用黎做沼氣，唔係邊度有能源用呀？』我見個女仔面有難色，不過黎到呢度，你唔去豬欄，咪係野外解決囉！個女仔最後都死死地去咁走左入去。我地其他人就坐係屋企面抖下涼傾下計。…」
「…過左一陣，忽然間，聽到個女仔好大聲咁慘叫喎！我地衝去豬欄睇下發生咩事，個女仔好驚咁話『我俾隻豬錫左一啖！』隔離有隻豬爬左上個圍欄，申個頭出黎望住個女仔。實情係個女仔香水味好重，農村既豬又點會聞過？所以咪好奇囉。個女仔之後果幾日都唔敢再去豬欄喇，要解決果陣點算？係樹下面，叫人睇住佢咪去囉！其實係農村，乜野都係回歸自然既！」
「然後我地食飯，原本諗住煮幾味農村菜，果幾個後生仔自告奮勇，話要俾我地試下美食之都既美食。好啦，你地咁大口氣，就俾你地試下啦！不過佢地見到個灶就無哂聲出，我地話『你地話要煮架！而家等你地架喇！』佢地就拎住個風爐係咁吹係咁吹，過左一陣同我地講話柴火燒唔著。咁細火，你仲搵個風爐吹佢，梗係吹熄架嘛係咪？好啦，好辛苦起到個火，開始煮野食，你知果啲係柴火，好難控制架，佢地將菜一放落去，轉個頭燶哂！我就同佢地講：『你美食之都，就係整燶哂既野食？』結果最後都係我地煮野俾佢地食。」
「不過總體上，果幾日都係玩得好開心既，係農村同係大城市生活唔同，後生仔都好快適應……」
我自己諗，以我呢種嬌生慣養既香港人，去農村一定同佢地果三個後生仔一樣大出洋相。只不過，不知大出洋相既香港人，抑或唔識應各地天氣既新彊人，還是暴發戶一般既大陸城市人，究竟邊個洋相出得大？
來季的利物浦
2009年6月8日 星期一
首先出場係我地神奇、頂級、超卓的隊長 Steve Gerrard！著住係09/10年的作客球衣，黑底紅間咁有型，真係好毒。年年都推出新球衣，球會都幾識搵錢。
講到錢，又要講d唔開心野。話說利物浦母公司KOP足球有限公司，上年虧損4,200萬鎊虧損，大家都諗紅軍要出售球員套現。原本賓尼迪斯想買華倫西亞射手韋拿和中場大衛施華，似乎都係失敗居多。
俗話有云趁火打劫，西班牙球會深明以道。先有皇家馬德里用2,200萬鎊搶沙比亞朗素，後有巴塞隆拿準備以2000萬鎊收購馬斯查蘭奴。計計下，賣曬沙比仔同馬斯查查奴的話，就可以填返母公司蝕的錢lu~ 不過，利物浦下季一次過失去 2 個防守中場，一定潰不成軍。
NBA Finals 2009 Game 2
險勝一場，大分二對零，統計過去六十年的數據，湖人已經超過九成機會贏得總冠軍，現在望就望魔術輸得好好睇睇，魔獸番主場打番一兩場好波，免得步奧尼爾後塵慘吞四蛋。
留意魔獸的左手在哪裏伸出唻蓋火煱
我有一雙隱形的翅膀
2009年6月7日 星期日
台灣歌手張韶涵流行歌曲「隱形的翅膀」成為北京高考作文試題。
「帶我飛，給我希望」，以流行文化作為考試題材，利多於弊，題目開放，考生易於發揮，年青人被認同，信心提昇，亦有助減低應試壓力。
於北京試題紙上留下台灣文化，亦別有一乎意義。
香港人的宅
買返間屋仔，組織自己的家，係唔少香港人的願望。但係係香港呢d大城市買間樓住，真係咁易？
首先係d樓真係好貴。我無記錯，全世界最貴的舖位，唔係紐約，唔係倫敦。係香港銅鑼灣對面果個角位舖！香港的地價係全球數一數二貴！而家咁的經濟環境，人人都驚無左份工，點解d樓仲係咁升？買完你驚唔驚做負家產？
就當你唔知點解咩都唔驚，又肯用曬你前半世的積蓄，走去買樓。
跟住就係質素。"縮水樓"？好多年啦，政府有無理？又計窗台，又要計電錶房，實際面積佔建築面積7成都無。好啦！見個私家平台咁靚，圍起曬，貴多少少都比啦。最後比人check到係公眾地方，有無咁取巧呀？地產佬！政府唔會唔知呢？講到尾，蝕的咪又係小業主。
講到尾，香港的大地主就係政府。你諗下，政府又點會比d樓平呀？香港人又點會夠樓住？有d外國人會唔仲意香港人。話點解下下都講錢，咁現實。或者佢地唔明，生活係香港，就係咁現實。又或者，活係大城市，就係咁~ 唉 ORZ
Yosumin! LIVE
SQUARE ENIX 推出既 XBOX Live Arcade 遊戲，玩法好簡單，九乘九既格仔板上括出四角有相同公仔既矩形，模式有 Endless 同 Battle，前者要指定時間內清除指定數量既公仔，後者就係同對手PK鬥快清得多，亦可以上網對戰，好彩有對手既話可即時開戰，可能係新出既關係，普遍都要等幾分鐘。對戰可以選自己既出場角色，建議選 Goldmin，因為其絕招係禁止對方移動幾秒鐘，隨時可以KO對手！
公仔幾可愛！
NBA Finals 2009 Game 1
2009年6月6日 星期六
湖人！冇錯，我係紫金戰隊既粉絲。
高比其中一個進球後既眼神，話俾大家知，湖人要第十五次拎冠軍喇！
滿以為魔獸會完全統治禁區，竟然早早俾西班人弄得兩犯休息，加上奧當、拜林，原來湖人內線都幾穩陣，值得一提既係魔術後備中鋒戈塔特，呢個波蘭人防守都幾好，如果火箭要物色姚明替補，此子值得考慮。
其實場波第一節都算緊湊，去到第二節，抖左四個月既明星控衛尼爾遜復出，不知是福是禍，本來打得好地地既艾士頓坐足第二節冷板，間接令魔術慢慢被拉開分數，史坦雲根迪真係有點失策。
湖人比騎士優勝之處就係經驗豐富，大比數領先下節奏控制得宜，唔會俾對手任何追平機會，魔術外線射手眾多，一旦著火，被絕殺就後悔莫及了。
Microsoft Good Show @ E3 2009
2009年6月5日 星期五
有錢就係有錢，微軟竟然請來音樂界、電影界和遊戲界猛人幫手撐場！Paul McCartney、Ringo Starr、Steven Spielberg、小島秀夫齊齊現身台上分享。
重頭戲碼當然係 Project Natal 啦！
先去片吧！
還有官網。
http://www.xbox.com/en-US/live/projectnatal/
Live 仲可以加埋 Facebook，又要開多個帳戶喇。
英國同愛爾蘭仲可以睇英超直播，如果來到香港既話，唔知本土收費電視會點應付呢？
齊齊看沙王！
你朋友睇緊乜呢？
PIXAR ● WALL-E ● UP
2009年6月3日 星期三
首先想介紹下彼思動作工作室( PIXAR ) ！未聽過Pixar？ 可能你無留意jer~
PIXAR做的電腦動畫(Computer Graphics Animation)一嬲都係世界第一。由故事，人物設計同技術，全部都係世界一流。近年的作品包括 太空奇兵●威E ( WALL●E )，海底奇兵( Finding Nemo)，反斗奇兵( Toy Story ) 同 怪獸公司 ( Monster Inc ) 等等。你唔會一個都無聽過掛？而家d小朋友鐘意咩卡通人物？仲係"米奇老鼠"，"hello kitty"? 未必，可能仲有 "巴斯光年" 同 "胡迪"。我諗迪士尼都係因為呢d電影主角的肖像權，所以成間 Pixar 買左。
(圖片轉自 : http://www.boxofficemojo.com )
08年出品的 WALL●E，我個人來講就好鐘意。 故事開頭無對白，但簡單的動作，巳經表達主角wall-e 的孤單。跟住內容大約係話wall-e 同住係太空船的人類巳經失去左自己的家 ─ 地球，回歸自己家既歷程。結局講人類終於返到巳經變成一座廢城既地球。雖然係廢城，但佢地都好開心。因為始終地球先係佢地的家，佢地的根。
睇到呢度真係好感動。人係犯賤，唔到失去果陣都唔會學識珍惜。今次Pixar就將人類無左地球的情形，以輕鬆的手法表現出來。勁！
話說有一日睇左套我反眼的 "大耳仔走天涯"，成套野除左主角做得令之後。其他野都係一文不值。 點知走果時聽到有人話好睇過WALL●E好多，佢話WALL●E唔講野，好悶。我心諗 "算~ 你唔識貨，我唔怪你"
( 圖片轉自:http://www.boxofficemojo.com )
今年的沖天救兵 (UP)，講的係 一個幼童軍，一個老人家 同 佢間屋飛上天的故事。之前有人話主角係老人家，老人家又悶又無活地，可能唔收得。UP係美國上星期五就巳經上左，打破美國今年首週最動票房錄。Up 上畫只係一個星期，就過左一d戲全部的票房。你話？點會唔好睇？
訂閱：
文章 (Atom)