食晏在灣仔：越旺

蘭杜街係近來好受歡迎既食街。唔記得街名唔緊要，呢條街就係一間蝦麵店所在既街道；而呢間越旺就正正係蝦麵店鄰居既一間越南食肆。

午飯時間去到蘭杜街，原本一心想去食蝦麵店；見到呢間舖同蝦麵店一樣人頭湧湧，一瞬間令我雀雀欲試，所以就改變主意喇。雖則多人食既野唔一定好，只不過試一下無妨，大不了咪當係瞭解下白領們食晏既口味？

舖頭不大，走動空間有限；不過我敢話黎蘭杜街食晏既人唔會要有幾好坐掛？主打既係越南湯河，我自己冇試過，睇到隔離食緊既一碗，放左好多香葉係上面，上菜果陣已經香氣四溢，下次一定要試真佢。至於我叫既，係上圖影果碗，蕃茄湯底既生牛肉河粉。蕃茄湯底不錯，味道夠濃，只係稱不上好獨特－要係其他地方試到咁既蕃茄湯底唔係難事。河粉係大路既貨色，牛肉勝在夠多，而且係貨真價實既「生牛肉」，唔會有上菜已經熟哂既問題。相比起普通湯底既生牛河，呢碗既配料只有芽菜同生洋蒽，缺少左香草既輔佐，感覺遜色不少。當然，蕃茄湯似乎冇必要再配咁多香葉－只係要係香葉同蕃茄湯底二選一，我會認為選香葉該比較好。

呢碗麵食左三十六蚊，算得上物有所值，只恨冇試到清湯底既生牛肉河粉，只有以後再試喇。

Read more...

食晏在筲箕灣：安利魚蛋粉麵

見高人寫飲飲食食寫得咁開心，等我又寫下先。為左慳錢，通常都係帶飯返公司食。比人笑做"帶飯仔"既我，一星期總有一兩日跟同事去食下飯既。前幾日就跟同事"打的"去左筲箕灣東大街食野啦~



去到門口巳經人頭湧湧，唔少白領同街坊都係門口等梗。好左唔駛等好耐就有位啦。同事話呢度出名既係切腩，當然要試一試啦。講到識食一定唔到我。係我媽媽既特訓下，我可以將食物歸類為"唔熟"，"熟"同埋"好食"。我諗今次既切腩，清得來又夠林，係好食既一類。

最後試左個好似叫做"多士奶多"既物體，係估唔到咁好食。外層個包夠熱，鬆化得來又夠脆，咬入去仲有凍牛油。真係好滿足。


食左一個滿足既lunch，charge足電下午又要返去做野啦~

Read more...

所謂才女，哈哈哈哈

144頁的小說中，文字佔33頁，錯處竟多達109個，如果以內地出版圖書的標準「差錯率少於萬分之零點七五」審查，鄧小姐已成被告。

先撩者賤，打死無怨，之前直斥o靚模越著越少布，現在被群插都是咎由自取。

鄧小姐出身咪又係o靚模，只不過身材平平，做唔成乳模，現在玩夠唱歌拍戲，又來影影相，出本圖多過字的所謂小說扮才女，令人欽敬。

一臉歉意的 Stephy甫開腔即道歉說：「我真係好認真同大家講，好抱歉有咁嘅事發生，係一時嘅疏忽，自己唔識打字，第一次打國語拼音輸入法，係新學，好多同音異字出嚟，一時錯漏揀錯字，自己亦都太依賴校對，所以冇睇多一次先。」

鄧小姐真是一個作家，慌話連篇，不精國語，用什麼國語拼音呢，那麼清閑學輸入法，不如去練歌啦。

Read more...

音樂人生 KJ : 細膩

今日專登走堂，同朋友睇一套泠門少少架"電影"，正確d黎講係一套記錄片 - 音樂人生 KJ

KJ 係指乜呢? 應該係指主角 家正 架英文拼音。故事主要講述 KJ小時候學琴同埋中學時期帶領同學參加比賽架故事。呢套紀錄片裡面對主角好多角度描寫，加埋主角多次剖白，觀眾可以了解到一個天才成長架心路歷程。導演比左好多地方比觀眾去思考，當中甚至有一段係成個銀幕黑晒，只係得音樂(我相信有人會以為個projector壞左, XD )。片裡面有一d位我幾中意，想同大家分享一下:



1. 天份
KJ佢細細個呢個音樂十一歲就去捷克同成班鬼佬合作 : 一個剷青左個頭架老積小朋友坐係鋼琴前面，而呢部琴就放係呢個樂團架中間位置，一班大人各自拎住樂器圍住佢彈，雖然我唔識大合奏排位個d野，但係憑排場可以想像出呢位小朋友對成個團有重要。我諗戲裡戲外架人都好認同,欣賞KJ架天份，片裡面亦都刻意剪出一段 : KJ跟隨住自已彈出黎澎湃音樂，忘形咁搖住佢小腦袋架同時，身後一位睇得好陶醉架音樂家亦露出會心微笑，我相信，觀眾面上架表情都會一樣^^

2. 討厭比賽
對於一個實力超凡架人，可能比賽考試呢d野對KJ黎講實在無太大意義，甚至討厭，佢追求的只有享受音樂。片中KJ帶領母校嬴左音樂比賽，但係佢唔認同身邊不停大叫勝利宣言架隊友，認為同學架團隊精神只係建基於比賽上面，並唔係佢想追求架人性。但係佢表達泠漠架同時，KJ架手指亦都跟隨住大家架口號，數住拍子，彷彿表達緊 : 我同你地追求目標唔同，相同的只有音樂

成套片雖然成日前前後後飛黎去有少少亂，但係成套片拍得好有力，值得一睇，但係有得播架映院唔多，場數亦都少，有興趣架朋友我諗要努力d撲飛啦^^

Facebook 音樂人生 page : link

預告片

Read more...

食晏在灣仔：北京水餃皇

唔食燒味既時候就會搵下其他選擇。呢間北京水餃皇係謝斐道近盧押道，大大個招牌。水餃都合我心水，去馬。


一碗韮菜豬肉水餃十隻三十蚊。放湯不放湯任君選擇－不過要視乎邊位侍應招呼你，呢個係後話。咬開餃子，韮菜香味十分清勁，豬肉份量亦恰當。試過其他的，只有羊肉水餃比較特別，其餘都比唔上韮菜豬肉餃。



睇到酸辣湯賣相都不壞，好多人會叫。不過大熱天怕食辣，有機會再試下啦。

呢間似乎係北方人開既舖頭，有幾位侍應講話會有口音。其中有一位阿叔，老實得可愛。以下對話，發問既係同台一位OL小姐。
「我想食水餃，有乜推介？」「韮菜豬肉水餃。」
「其他呢？」「其他都唔好食。」
「咁…要韮菜豬肉水餃。」「放唔放湯？」
「有乜分別？」「你地食慣放湯。我地唔放。」
「唔…」「快O的！」
「好啦，要放湯既…」

同台有兩位北方同胞，叫左二百幾隻餃子，仲有酸辣湯、小菜、豆漿等等。阿叔二話不說，俾兩兜冇放湯既餃子佢地。一種餃子，兩地食法。希望唔好有一日係Openrice見到有人寫話，「呢間舖連放餃子既湯都慳…」

Read more...

五天工作週 VS 公眾假期條例

故事係講生於2006年既"五天工作週"同埋係1998年出世的"公眾假期條例"。

由政府帶頭推行既"五天工作週"，相信係打工仔福音。佢令到打工仔可以"減輕工作壓力，提高家庭生活質素"。相信好多打工仔都好鐘意佢。我識認既"五天工作週"，就係打工仔只係需要返星期一至五，星期六日就放下假咁。一個星期有2日休息下梗係好啦，夠休息先可以有精神做野麻。

講起<<公眾假期條例>>，可能無咩人識佢。但係我地打工仔可以放假都係靠曬佢。簡單來講佢令你可以"星期日放假"同埋有"補假"。就係"補假"？即係如果聖誕節(12月25日)係星期日的話，咁公眾假期就改為翌日咁拉。

大家諗下佢地放埋一齊有咩問題？無錯。問題就係"補假"！既然返工都係星期一至五，點解要訂Ｄ公眾假期係星期六？可能有人會話，咁計埋Ｄ小數目啦。兩日就算啦。事實係2009同2010年，17日公眾假期假期中，就有成有5日係星期六啦。

放梗星期六日的打工作，見到Ｄ公眾假期咁定法。唔知會唔會覺得無奈呢？
你估呢件事多Ｄ人知，政府會唔會做Ｄ野呢？


2010年公眾假期
http://www.gov.hk/tc/about/abouthk/holiday/

Read more...

星期六日 ＝ 壞天氣 ？

負能怪四眼仔：唉，打波先黎落雨。唔通連個天都唔鐘意我？
樂觀既高佬：咪咁啦，聽日會好天架啦～
負能怪四眼仔：你又知聽日會好天？
樂觀既高佬：希望在明天嘛！（帶著自信同微笑）
負能怪四眼仔：聽日巳經係星期一，要返工ｂｏｒ
樂觀既高佬：　．．．．．．


呢排個個星期六日, 唔係打風就落大雨。點解唔可以係weekday打下風同掛黑球既呢？唔通香港政府巳經研究到點控制天氣？你睇下，照預計圖，颱風莫拉菲(Molave)小姐係星期日同我地最親近。跟住星期一佢就會走，阻唔到我地返工啦... orz!

Read more...