柏林國際電影節2009 ：有趣味但編排差

八部風格迴異既短片，反映出八種文化，八地思愁。


近來每年仲夏既時間，百老匯電影中心都會有一系列獨立電影播映，主辦單位稱為InDPanda國際電影節，基本上都係播出獨立製作電影，可以去官方網頁參考一下。

今次睇既系列，能稱為非主流電影，主要從文化角度出發去拍攝，即使有戀愛題材，亦都唔係通俗既愛情故事，可以作為文化剪影既銀幕演出。獨立電影係製作上當然不能與商業電影相比，不過以天馬行空既題材，更能體會製作人既用心。

第一套「The Suffering of Mr. Karpf. The Birthday」（圖片由左至右上至下排列），有少少古早cult片既感覺，十分鐘只有男主角獨白，睇佢生日等待朋友祝賀既心情，由期待、失望，一下子又突然有爆滿既行程，趣味性慢慢浮現。

第二套「Oh, My God!」，三個女孩子對性高潮既疑惑；一般電影避而不談又或者係過份渲染既題材，呢套片透過三位外表天真無邪既小女孩，發表得恰到好處。

第三套「Aphrodite's Farm」，係八套裡面最有電影味既一套，不過觀其龐大既製作班底，似乎應稱為專業製作喇。主題並不深入，勝在有四五十年代電影既演繹風格，故事亦好完整。

睇左三套片，大概半個鐘既光境，正當明亮既畫面依然停留係腦海之際，鏡頭忽然一轉，播出一套極沉重既「The Illusion」。呢套片內容十分政治化，講述一個古巴藉女兒同佢搞政治而被逐既老爸，多年不見後既會面情形…應該話係表達女兒既心理狀況。全片一直都係偷拍既鏡頭，畫面模糊陰沉，觀眾只能以對白來猜度外間發生既事。當然，以咁既手法表達女兒對父親模糊既印象，係好入題－之不過時間過長（感覺上播左半個鐘），對白過多，畫面不足以表達故事內容，令到出黎既效果彷似發聲小說；雖然有內涵，亦不能忽略作為電影需要既元素，呢套片似乎玩得太偏峰了。

第五套「叢林灣」，新加玻既同志電影；不過形式上唔係一般人印象中情慾既電影，而係以紀錄片既形式，講述當時新加玻對同志既政策，當中亦穿插記者對主角既感情；題材稱得上新穎。做受歧視既小數族群，有苦自己知，零散既感情亦一樣苦。

第六套「Slaves」，一套CG紀錄片，由兩位蘇丹既少年講佢地做奴隷既經過。內容十分深刻，而CG雖然不能話靚，但係十分漫畫化而極具風格，表達做奴隷既小朋友生活既淒苦、被虐殺既震撼，係八套片裡面最令人印象深刻。

第七套「Jade」，描寫一個少女背男友偷食懷孕而忐忑不安既心情。畫面十分唯美，不過鏡頭十分零碎，而且大頭過份多，就算做為描寫少女心情變化，亦未兔過火了；相比之下肢體語言缺乏，對白也少得可憐，故事性唔夠，變左美麗既電子相薄。製作班底亦頗為龐大，而且有MPC支援，係獨立電影中既大製作嗎？

最後一套「Please Say Something」，十分超現實手法表達既現代愛情故事。表演手法同意念係十分新穎，不過CG技術低得可憐，十年前既電腦遊戲都有更好既畫面；而且音效整體上都十分尖銳，一般既觀眾根本冇可能接受，只能話太過前衛了。

睇完八套片，兩個鐘已過去，鬆一口氣感覺係：分開睇會好好多！正如標題所講，八套電影其實都好有特色，亦有其思想，雖然個別有不足既地方，整體仍具可觀性－只不過當八套片連續係兩個鐘頭內播出，中間既悶場對觀眾影響不可謂小，而太前衛既片作為壓鈾，只有令觀眾提早離場…