心跳500天 (500 Days of Summer)

小品愛情故事，＜心跳500天＞為觀眾輕描淡寫現代愛情觀。故事男主角係一個對愛情極度憧憬既男仔；有一日係公司遇上女主角Summer，就認定佢係終身伴侶…

呢套係輕鬆既愛情電影，平淡中慢慢帶出故事。男主角由最初充滿幻想，慢慢變為對現實不滿，乃至鬧交收場，到最後一心以為大團圓，至發現女友已嫁為人婦！劇情起伏需不至意料之外，不過導演巧妙咁穿插時空，將兩人五百日相處既日子打亂，以交叉倒敍既形式組合故事，將日子當做標題，雖然時空交錯但毫無混亂既感覺。

故事帶出男主角愛情觀既謬誤：過份自我。一開始佢沉醉係愛情既甜美中，將一見鍾情既人當係終身伴侶，幻想自己係對方心中既地位，盲目地投入呢段感情…等到有一日突然醒來，發現自己所相信既愛情原來只係霧水一場，佢亦只不過係女友人生中一過過客而已－－不過，佢又可以怪邊個呢？即使女主角一開始就話只係不認真地交住，即使連小妹妹都睇得出佢過份理想化，可憐既男主角依然自我咁描畫美好既愛情幻想。直至最後，霧散去，夢醒來，主角亦都要返回現實；命中注定既愛情，聽起來好浪漫，之不過浪漫背後既實質相處，卻係由平淡既元素加起來支橕。結局係悲劇既苦？抑或係帶住領悟既新開始？

男女主角外型唔算突出，不過演出有喜劇感。最巧妙係好多細節既佈置，倒如換日子既畫面，以天氣黎映射男主角既心情，又或者間場既懷舊戲中戲，以誇張既手法表達男主角既幻想同女主角既吸引力等等，交織成賞心悅目既故事。