Inglourious Basterds：電影味十足

香港譯做「希魔撞正殺人狂」 ，撇除劣拙既譯名唔講，單單係導演一個人已經夠哂號召力。

故事發生係二戰時期既法國，以章回式去展開；主線講一個猶太女子既復仇，同時亦有美國及英國特務既事蹟，一開始睇落毫無關係既故事，以一個反派既納綷軍官Landa貫通全場，幾方同時指向戲院一幕為最終目標。整齣電影佈局十分巧妙，主線峰迴路轉；女主角Shosanna企圖利用德國青年軍官既愛去達成復仇既目的，最後卻因為微妙既感情同軍官雙雙中槍而亡；Landa身為納綷既中堅人物，狠辣忠誠，辦事能力極高，但係到最後原來佢最精心安排既，係向盟軍投降換取榮華富貴；所有其他伏線最後都有交代，諸如安排俾希特拉死係「猶太神熊」手上，實在係發揮黑色幽默既極致。

運鏡手法亦都係電影突出既地方。最後一幕，戲院大廳裡面，各人心懷鬼胎之際，鏡頭卻係一氣呵成，跟隨女主角走下階梯去迎接青年軍官，又帶番去Landa出場去拆穿美軍們既詭計，毫無間斷，巧妙咁將觀眾帶入戲中。

女主角Melanie Laurent演既奇女子復仇味不俗，而且十分美艷，Brad Pitt稍為浮誇，但係戲中亦唔突兀；不過最突出既係演反派軍官Landa既Christoph Waltz，舉手投足自信十足，由頭帶到落尾都係最觸目既角色。

此片聽說乃係致敬作品，我冇睇過1978年既版本，不敢隨便下定論；不過以戲論戲，入場睇絕對係值回票價。